महोन्नय

महोन्नय ग्रंथाविषयी प्रकाशनाच्या निमित्ताने ग्रंथकर्ते परमपूज्य परमात्मराज महाराज यांनी व्यक्त केलेले मनोगत -
'महोन्नय' ग्रंथात वैतञ्च्यनिर्मूलनापासून बंधनिर्मूलनापर्यन्तचे सगळे विचार आहेत. म्हणजेच त्यात विविध अनिष्ट बाबींच्या निर्मूलनाच्या संबंधाने सैद्धान्तिक विचार माण्डलेले आहेत.

महोन्नय या ग्रंथामध्ये लिहिलेल्या अनेकानेक घटना जनतेसाठी उद्बोधक ठरणार आहेत. नाना जातिजमातींमधून उदयास आलेल्या अनेक महात्म्यांच्या संबंधातील कथा ह्या जनमनांमध्ये ऐक्यभाववृद्धीसाठी उपयुक्त ठरणार आहेत.

'महोन्नय' या ग्रंथाच्या वाचनाने जनमननांमधील अनेक संशयांचे निराकरण होईल. सहज समजणाऱ्या भाषेतील हा ग्रंथ सामान्यांपासून गहन अभ्यासकांपर्यन्त सर्वांनी वाचावा असा आहे.

जीवन उद्ध्वस्त होण्यापासून वाचविणारे विचार व सदैव संस्मरणीय असे विविध दृष्टान्त या ग्रंथांमध्ये आहेत. सुखी व समाधानी जीवनासाठी, जीवनात अनिष्ट गोष्टी टाळण्यासाठी तसेच आध्यात्मिक साधनेतील रहस्ये सहजसोप्या भाषेत समजून घेण्यासाठी हा ग्रंथ भाविकांना अतिशय महत्त्वाचा वाटेल. यावरून सर्वांना हे कळून येईल की 'महोत्रय' हा ग्रंथ सर्वजनहिताच्या दृष्टीनेच रचले आहेत. या ग्रंथाच्या नांवातील रहस्ये त्या ग्रंथात बघायला मिळेल. सद्ग्रंथ प्रकाशन सोहळा हा एक महान् सुयोगरूप असतो. असा हा महान् सुयोग सर्व श्रद्धावंतांच्या जीवनात आनंदाचा, सौहार्दाचा, मांगल्याचा प्रकाश घेऊन येत असतो. त्यामुळे सद्ग्रंथ प्रकाशनोत्सव हा निश्चितपणे सर्वांसाठी प्रकाशोत्सव ठरत असतो, यात तीळमात्र शंका नाही.

[ महोन्नय ग्रंथ प्रकाशन तिथी - फाल्गुन शु. सप्तमी शक १९३९ ( दि.२२/२/२०१८) ]